સીંગવડમાં CMની ગાડીમાં સ્નેહલ ધરીયાની સવારીથી ગરમાવો: હેલિપેડથી સભા સ્થળ સુધી પ્રમુખ સતત મુખ્યમંત્રીની પડખે રહેતા મંત્રીઓ અને ધારાસભ્યોમાં પણ ભારે કુતૂહલ સાથે અટકળો તેજ

• દાહોદમાં CMની ગાડીમાં સ્નેહલ ધરીયાની સવારી: રાજકીય ગરમાવો તેજ

• ​હેલિપેડથી સભા સ્થળ સુધી પ્રમુખ CMની પડખે: અટકળોનું બજાર ગરમ

Advertisement


• ​સંગઠન પ્રમુખ અને મુખ્યમંત્રી વચ્ચે બંધ બારણે મંથન: નવા સમીકરણોના એંધાણ

• ​મંત્રીઓ-ધારાસભ્યો જોતા રહ્યા અને સ્નેહલ ધરીયા CMની ગાડીમાં સવાર થયા

• ​દાહોદ પ્રવાસમાં પ્રોટોકોલ ચર્ચામાં: CM અને પ્રમુખની નિકટતાએ સૌનું ધ્યાન ખેંચ્યું

દાહોદ તા.15

મુખ્યમંત્રી ભૂપેન્દ્ર પટેલની દાહોદ મુલાકાત આજે રાજકીય દ્રષ્ટિએ ભારે ચર્ચાસ્પદ રહી હતી. સિંગવડ ખાતે 367.78 કરોડના વિકાસ કામોના લોકાર્પણ માટે આવેલા મુખ્યમંત્રીના સમગ્ર પ્રવાસ દરમિયાન દાહોદ જિલ્લા ભાજપ પ્રમુખ સ્નેહલ ધરીયા મુખ્ય આકર્ષણનું કેન્દ્ર બન્યા હતા. હેલિપેડ પર ઉતરાણથી લઈને પરત વિદાય સુધી સ્નેહલ ધરીયા મુખ્યમંત્રીની ગાડીમાં જ તેમની સાથે સવાર જોવા મળતા જિલ્લાના રાજકીય ગલિયારાઓમાં અટકળો અને તર્ક-વિતર્કનો દોર શરૂ થયો છે.

પ્રોટોકોલથી હટીને સંગઠન પ્રમુખને વિશેષ પ્રાધાન્ય

મુખ્યમંત્રીના હેલિપેડ પર આગમન સમયે મંત્રીઓ, સાંસદ અને ઉચ્ચ અધિકારીઓ સ્વાગત માટે હાજર હતા. પ્રોટોકોલ મુજબ સામાન્ય રીતે ગાડીમાં મુખ્યમંત્રી સાથે વરિષ્ઠ મંત્રી કે સચિવો સવાર થતા હોય છે, પરંતુ અહીં સૌના આશ્ચર્ય વચ્ચે મુખ્યમંત્રીએ જિલ્લા ભાજપ પ્રમુખ સ્નેહલ ધરીયાને પોતાની ગાડીમાં સાથે બેસાડ્યા હતા. હેલિપેડથી સભા સ્થળ સુધીની આ સવારીએ જ પ્રથમ ગ્રાસે મક્ષિકાની જેમ રાજકીય ગરમાવો લાવી દીધો હતો.

લોકાર્પણ કાર્યક્રમથી સાંસદના નિવાસસ્થાન સુધીની નિકટતા

માત્ર સભા સ્થળ જ નહીં, પરંતુ સિંગવડ મામલતદાર કચેરીનું લોકાર્પણ હોય કે સાંસદ જશવંતસિંહ ભાભોરના દાસા સ્થિત નિવાસસ્થાને જવાનો કાર્યક્રમ, દરેક સ્થળે સ્નેહલ ધરીયા મુખ્યમંત્રીની પડખે જ જોવા મળ્યા હતા. સાંસદના ઘરેથી પરત હેલિપેડ સુધી પહોંચવા દરમિયાન પણ સ્નેહલ ધરીયા અને મુખ્યમંત્રી વચ્ચે ગાડીમાં લાંબો સમય સંવાદ ચાલ્યો હતો. આ ઘટનાક્રમે અન્ય સ્થાનિક નેતાઓ અને ધારાસભ્યોમાં પણ છૂપી ચર્ચા જગાવી છે.

અટકળોનું બજાર ગરમ: શું કોઈ મોટો ફેરફાર આવશે?

સરકારી કાર્યક્રમની વ્યસ્તતા વચ્ચે મુખ્યમંત્રીએ જે પ્રકારે સંગઠનના પ્રમુખને સતત પોતાની સાથે રાખ્યા, તે કોઈ મોટા રાજકીય સંકેત તરફ ઈશારો કરી રહ્યા હોવાનું મનાય છે. આગામી સમયમાં સંગઠનમાં કોઈ મહત્વના ફેરફાર કે જિલ્લાના જટિલ પ્રશ્નો અંગે મુખ્યમંત્રીએ અંગત રસ લઈને ચર્ચા કરી હોવાની સંભાવના છે. સ્નેહલ ધરીયાની મુખ્યમંત્રી સાથેની આ ‘સ્પેશિયલ સવારી’ હવે દાહોદના રાજકારણમાં કયા નવા વળાંક લાવશે તેના પર સૌની મીટ મંડાયેલી છે.